كنت فى غايه الحزن والهم مع اقتراب شهر رمضان , فمع كثره الطلبات من الزوجه والاولاد وبدايه العام الدراسى فى شهر رمضان ورغبه زوجتى فى تغير السياره كما فعلت صديقتها وهما مش احسن مننا وبالمره نجيب طلبات رمضان مره واحده من كارفور او مترو والاولاد طلبوا منى مصاريف المدارس من كراسات ودروس خصوصيه وملابس مدرسيه كله مره واحده بلا رحمه مع انه شهر الرحمه
فجأه اتصل بى صديق الطفوله على التليفون المحمول وقال لى مبروك يا عم بصوت فيه فرحه . قلت له خير : علاوه اونطه من بتوع حسنى مبارك تتكلم عنها الجرايد شهور وتضيع فى ثانيه؟ رد وقال لى لأ مفيش علاوه. قلت له طيب ترقيه جديده وفلوس فى السكه ؟ برضه قال لى مفيش ترقيه؟ طيب مبروك على ايه؟ قال لى مبروك يا عم هيفاء وهبى هى بطله فوازير رمضان بعد الافطار . ومخبيش عليكوا بعد ماكنت حزين مهموم فجأه شعرت بانى طاير من الفرحه مش عارف اعمل ايه .. قلت اجيب تليفزيون ملون مسطح كبير الحجم بالالون من العربى بالموسكى علشان اشوف هيفاء وهبى بعد يوم طويل من الصوم والعطش والعباده هى بترقص يمين وشمال وتنط فوق وتحت وتدلع نفسها وتثير الغزيره اللى كانت نايمه مع الصيام . دى هيفاء يا عم دى دلوعتى انا ياعم وبعدين دى مره فى السنه يا سيدى هى جت علينا احنا الغلابه بس ولهذا قررت ان انشر السعاده على الجميع حتى يعلموا بهذا الخبر السعيد فبشرى لاهل مصر وقاهره المعز والامه الاسلاميه بوجود هيفاء وهبى كنجمه فوازير شهر رمضان بعد الافطار فهذه هى البدايه والطريق الصحيح لتحرير المسجد الاقصى والقدس والارض العربيه المحتله وصوما مقبولا وافطارا شهيا على رقصات هيفاء ودلوعتى انا فى الفوازير الرمضانيه و تحيه لتلفزيون مصر العربيه على هذا الاتجاه الكبير فهذه هى اولى الخطوات للوصول الى سطح القمر وهذه هى البدايه الصحيحه للنهوض والارتقاء بالمجتمع. لكن ياترى عندى سؤال : اذا هيفاء هى نجمه الافطار فى رمضان مين هى اللى هتبقى نجمه السحور
ولكى الله يامصر
